Swyddi Cymraeg

Menter a ddechreuwyd gan Lywodraeth Cymru yn 2018 yw e-sgol, gyda’r nod o gynorthwyo ysgolion i gynnig ystod mor eang â phosibl o bynciau TGAU a Safon Uwch. Defnyddir dull hybrid i addysgu pynciau drwy e-sgol.

Ym mis Ionawr 2021, comisiynwyd e-sgol gan Lywodraeth Cymru i hwyluso a chynnal cyfres o sesiynau adolygu byw ar gyfer myfyrwyr TGAU, Uwch Gyfrannol a Safon Uwch. Dyna gychwyn y prosiect Carlam Cymru.

Mae sesiynau adolygu Carlam Cymru yn cefnogi myfyrwyr ledled Cymru ar draws ystod o bynciau craidd a di-graidd. Cynhelir y sesiynau hyn fel Digwyddiadau Byw ar ddyddiadau penodol ar ôl oriau ysgol, gyda phob sesiwn yn cael ei recordio. Caiff y recordiadau eu rhoi ar wefan e-sgol yn dilyn y digwyddiadau byw er mwyn darparu adnoddau adolygu i fyfyrwyr ledled Cymru.

Hyd yma, mae 4 rownd o sesiynau adolygu Carlam Cymru wedi’u darparu, sef Gwanwyn 2021, Hydref 2021, Gwanwyn 2022 a Hydref 2022. Bydd Carlam Cymru yn parhau yn ystod 2023 a’r tu hwnt i hynny.

Y rôl

Rydym yn edrych am athrawon brwdfrydig sy’n dysgu cyrsiau TGAU a/neu Safon Uwch yn eu hysgolion ar hyn o bryd, neu sydd wedi dysgu yn ddiweddar, a fyddai’n gallu cyflwyno sesiynau adolygu ar-lein yn hyderus.