Swyddi Cymraeg

Pwrpas Cyffredinol y Swydd

Cynorthwyo yn y gwaith o ddatblygu a chyflenwi cyfleoedd Dysgu Oedolion yn y Gymuned a ddarperir mewn lleoliadau ar draws Ynys Môn.

• Cynllunio, trefnu a chyflenwi hyfforddiant Llythrennedd Digidol a Gwybodaeth i aelodau o’r cyhoedd a staff, ynghyd â hyrwyddo’r defnydd o blatfformau Digidol y Gwasanaeth.

• Cynnal cysylltiadau da gyda phartneriaid o fewn y sector ar draws yr ardal ddaearyddol a chynrychioli’r Awdurdod mewn cyfarfodydd perthnasol ar lefel weithredol.

• Bod yn gyfrifol am waith trefnu dydd i ddydd cyrsiau mewn amryw leoliadau, yn unol ag anghenion y Gwasanaeth ac mewn ymateb i anghenion dysgwyr.

• Cadw cyswllt gyda grwpiau cymunedol a chyrff trydydd sector er mwyn deall am angen/awydd posibl am gyrsiau a dysgu anffurfiol mewn cymunedau ar draws Môn

Cy**ffredinol: **C_ydymffurfio â Pholisi Diogelu Corfforaethol yr awdurdod lleol a’r dyletswyddau a chyfrifoldebau diogelu y mae’r polisi hwnnw’n ei roi ar bob gweithiwr, gan gydweddu â gwerthoedd craidd yr Awdurdod sy’n cynnwys cefnogi plant, oedolion a all fod mewn perygl a’u teuluoedd er mwyn eu cadw’n ddiogel ac iach._

Prif Ddyletswyddau / Cyfrifoldebau

• Cynorthwyo yn y gwaith o gyflenwi ystod o raglenni i aelodau o’r cyhoedd a staff, sy’n cynnwys cyfeirio ymlaen i lwybrau datblygu gyda darparwyr addysg, yn ogystal â gweithio i sefydlu perthynas gyda lleoliadau newydd ar mwyn ehangu’r cynnig Dysgu Oedolion yn y Gymuned o fewn ardal yr Awdurdod Lleol.

• Cynorthwyo yn y gwaith o ddatblygu a chydlynu’r systemau a phrosesau a ddefnyddir ar gyfer ymgysylltu â chyfranogwyr, yn ogystal â’r rheiny a ddefnyddir i ddarparu cymorth, cyngor ac arweiniad.

• Cynllunio, trefnu a chyflwyno gweithgareddau digidol a chreadigol i blant o bob oed gan ddefnyddio’r offer sydd ar gael o fewn y Gwasanaeth (Raspberry-Pi, Lego Education, I-Pad, Sgrîn werdd ac offer ffotograffiaeth)

• Cynnal cysylltiadau effeithiol â darparwyr gwasanaeth a phartneriaid eraill, gan gynnwys (heb eithrio eraill) Grŵp Llandrillo Menai, Addysg Oedolion Cymru, CyG Môn, Teulu Môn a Dechrau’n Deg.

• Gweithio gyda’r Tîm Llyfrgell a’r Tîm Cyfathrebu Corfforaethol i sicrhau marchnata a hyrwyddo’rgwasanaeth yn effeithiol.

• Cyfrannu tuag at y Cynllun Cyflenwi Gwasanaeth ar gyfer gweithgareddau Dysgu i Oedolion yn y Gymuned.

• Mynychu cyfarfodydd lleol a rhanbarthol perthnasol ar ran y gwasanaeth.

• Cynorthwyo i gadw tudalennau gwe'r gwasanaeth llyfrgell yn gyfredol a pherthnasol sy’n gwneud hi’n haws i ddefnyddwyr gael mynediad at wybodaeth a gwasanaethau llyfrgell.

• Cynorthwyo i ddatblygu cyfrifon cyfryngau cymdeithasol y Gwasanaethau Llyfrgell a Dysgu Oedolion yn y Gymuned o ran cynnwys, effaith a chyrhaeddiad gan ddefnyddio ystod o ddulliau gwahanol i greu cynnwys digidol ar gyfer uchafu potensial hyrwyddo a marchnata.

• Cyfranogi mewn unrhyw weithgareddau hyfforddiant a datblygu er mwyn cynnal datblygiad proffesiynol a hybu cymhwysedd o fewn rôl y swydd.